Հայկական մշակութային ակտիվ կյանքն ընդդեմ կորոնավիրուսի

Ամբողջ աշխարհում նոր կորոնավիրուսի տարածման պատճառով, հանրության անվտանգության կարևորությունից ելնելով, տարբեր երկրներ, այդ թվում նաև Հայաստանի Հանրապետությունը, իրենց երկրներում հայտարարեցին արտակարգ դրություն, ինչը ենթադրում է տարբեր ուսումնական հաստատությունների, մշակութային օջախների, ժամանցավայրերի և այլ բազմաթիվ կազմակերպությունների աշխատանքի ժամանակավոր կասեցում: Տարբեր անհատներ և կառույցներ միացան նախաձեռնությանը՝ հորդորելով մարդկանց մնալ տանը և աշխատանքը կազմակերպել հենց տանից։ Ուսումնական պրոցեսին զուգահեռ՝ մարդիկ հնարավորություն ստացան նաև առցանց այցելել աշխարհի լավագույն գրադարաններ, թանգարաններ, պատկերասրահներ. ճանապարհորդել աշխարհով մեկ՝ ԱՆՎՃԱՐ: Այսպիսի հնարավորություն ունեն նաև երևանյան մշակութային կյանքով հետաքրքրվող զբոսաշրջիկներ, մայրաքաղաքի և երկրի տարբեր մարզերի բնակիչներ: Այսպես՝ մայրաքաղաքի լավագույն ժամանցավայրերը, թատրոններն ու կինոթատրոնները կազմակերպում են անվճար առցանց դիտումներ, որոնց կարող եք հետևել՝ այցելելով նրանց ֆեյսբուքյան պաշտոնական էջեր կամ հետևել Yerevan Events-ի ինստագրամյան և ֆեյսբուքյան պաշտոնական էջերին, որտեղ պարբերաբար կլինի տեղեկատվություն առաջիկա առցանց միջոցառումների վերաբերյալ: #Մնատանը նախաձեռնության շրջանակներում՝ Պատանի հանդիսատեսի թատրոնն առաջինն էր, որը հնարավորություն ընձեռեց իր փոքրիկ ու հավատարիմ հանդիսատեսին online տարբերակով դիտել ներկայացումներ։ Նախաձեռնության միացած Հ.Պարոնյանի անվան երաժշտական կոմեդիայի պետական թատրոնը, պարբերաբար թարմացնում է սպասվող ներկայացումների ցանկը, իսկ Հ.Ղափլանյանի անվան դրամատիկական թատրոնը չհապաղեց իր ֆեյսբուքյան էջում ցուցադրել մի շարք ներկայացումներ, որոնք Ձեզ շատ կհետաքրքրեն: Գ.Սունդուկյանի անվ. ազգային ակադեմիական թատրոնի հանդիսատեսը ևս կկարողանա միանալ Մայր թատրոնի լավագույն ներկայացումների տեսագրությունների առցանց ցուցադրությանը՝ հետևելով թատրոնի ֆեյսբուքյան պաշտոնական էջին: Իսկ Հովհ. Թումանյան թանգարանը բացի առցանց ուսուցողական հոլովակների ցուցադրությունից՝ մարտի 21-ից ապրիլի 14-ը ներկայացրեց «Կտոր մը հումոր» թանգարանային կոմիքսների առցանց փառատոնը: Փոքրիկների օրը լիարժեք դարձնելու համար, առցանց ցուցադրությունների նախաձեռնությամբ է հանդես գալիս նաև Happium մանկական ժամանցի կենտրոնը:Նախաձեռնությանն են միացել նաև Հայաստանի ազգային պատկերասրահը, Ա. Սպենդիարյանի անվ. Օպերայի և բալետի ազգային ակադեմիական թատրոնը, Հ. Մալյան անվան թատրոնը, Պետական Կամերային երաժշտական թատրոնը և մի շարք այլ թատրոններ:Նախաձեռնությանը միացած մշակութային կազմակերպությունների թիվն ամեն օր ավելանում է, ինչը, եկեք խոստովանենք, լավ հնարավորություն է մասնակցել տարաբնույթ միջոցառումների՝ առանց տանից դուրս գալու և ժամանակ ծախսելու: 

#Մնատանը նախաձեռնությանը միացած Yerevan Events նախագիծը նույնպես հորդորում է աշխատանքը կազմակերպել տանից և խուսափել բազմամարդ միջավայրում հայտնվելուց, ազատ ժամանակն օգտագործել առավել օպտիմալ, զբաղվել ինքնակրթությամբ, լիցքավորվել դրական տրամադրությամբ և պատրաստվել առաջիկա աշխատանքային ռիթմին: Իսկ մենք կտեղեկացնենք Ձեզ նաև երևանյան առցանց միջոցառումներին: