Հայկական կինոն՝ սահմանամերձ շրջաններում։ Նոր հուշագիր

«Հայաստանի ազգային կինոկենտրոն» ՊՈԱԿ-ի տնօրեն Շուշանիկ Միրզախանյանը և Տավուշի մարզային հեռուստաընկերության`Տավուշ TV-ի  գլխավոր պրոդյուսեր Նիկոլայ Գրիգորյանը այս տարվա հունիսի 1-ին  ստորագրեցին համագործակցության Հուշագիր։ 
Համագործակցության նպատակն է հայկական կինոն  հասանելի դարձնել երկրի սահմանամերձ ու հեռավոր շրջաններում՝ ապահովելով մարզերում մշակութային արտադրանքի (ֆիլմերի) հասանելիությունն ու մատչելությունը,  հաղոդակից դարձնելով մարզերի բնակչությանը ժամանակակից կինոպրոցեսներին։
Տավուշի մարզը Հայաստանի  հեռավոր սահմանապահ բնակավայրերից է և տեղի սահմանամերձ գյուղերում  հայկական ժամանակակից ֆիլմերի ու  կինոժառանգության նմուշների շարունակական ցուցադրումները  չափազանց կարևոր են։
Հուշագրի վավերացման օրը՝  հունիսի 1-ը, պատահական չէր ընտրվել․ երեխաների պաշտպանության միջազգային օրվա առիթով՝  Հայաստանի ազգային կինոկենտրոնը պատրաստել էր  մանկական ֆիլմերի և մուլտերի զանազան փաթեթներ, որոնք էլ ցուցադրության համար՝ նույն օրը, փոխանցվեցին Տավուշ-TV-ին։
Հայաստանի ազգային կինոկենտրոնը նախատեսում է նաև կազմակերպել բացօթյա ցուցադրություններ Տավուշի մարզի սահմանամերձ բնակավայրերում, երբ կնահանջի համաճարակը, և հնարավոր կդառնան ազատ շփումները։