«Թոմ և Ջերի» մուլտֆիլմը վերադառնում է մեծ էկրաններ

Երբ 2014 թ.-ին Cartonn Network կինոընկերությունը հայտարարել էր, որ «Թոմ և Ջերի» մուլտսերիալի նոր՝ 11-րոպեանոց մասերը կրկնելու են նախորդ սերիաների հաջողությունը, գուցե չէր կանխատեսել 2021թ.-ի փետրվարի 26-ը, որին սպասում է ամբողջ աշխարհը: Այո, հենց այդ ամսաթվին է նախատեսված «Թոմ և Ջերի» ֆիլմի պրեմիերան:

Լավ թշնամիները, բայց վատ ընկերները, ինչպես նրանց կոչում են մուլտֆիլմի սիրահարները, այս անգամ հայտնվելու են աշխարհի խոշորագույն քաղաքներից մեկում՝ Նյու-Յորքում: Իսկ, որ ամենակարևորն է, մուկն ու կատուն կրկին լինելու են  թղթի վրա նկարված, իսկ նրանց շրջակա միջավայրը և մարդիկ՝ իրական:

Նյու-Յորքի ամենամեծ ու շքեղ հյուրանոցներից մեկ է ժամանում Ջերին, որտեղ պետք է կայանա «դարի հարսանիքը»: Ջերիի ժամանումը դուր չի գալիս հյուրանոցի՝ Քայլի անունով աշխատակցուհուն  և նա դիմում է Թոմի օգնությանը: Ըստ այդ աշխատակցուհու՝ Թոմը պետք է ազատվի Ջերիի ներկայությունից, քանի որ մկնիկը կարող է վտանգել սպասվող կարևոր իրադարձությունը:

Warner Bros. Pictures կինոստուդիան նախապես հայտարարել էր, որ ֆիլմի պրեմիերան պիտի կայանա մարտի 4-ին, հաշվի առնելով նաև Covid-19-ի նոր ալիքի տարածումը, սակայն ինչպես երևում է, քննարկումների արդյունքում նախանշված օրը տեղափոխվել է այս ձմռան վերջ: Ի ուրախություն շատերի ձմռան վերջին օրերը հետաքրքիր կլինեն նաև Հայաստանում, քանի որ ֆիլմը ցուցադրվելու է նաև երևանյան կինոթատրոններում:

Ի դեպ՝ առաջին անգամ «Թոմ և Ջերի» մուլտֆիլմը կինոէկրան է բարձրացել 1940թ.-ին, իսկ վերջին սերիան նկարահանվել է 1972թ.-ին:
Անվերջ փախչող մկնիկին ու նրան հետապնդող կատվին սիրում են շատերը, սակայն չկա հստակ պատասխան՝ ավելի շատ փոքրիկները, թե՞՝ մեծերը, ուստի նոր սերիաների թողարկումից անշուշտ ուրախանում են նրանք բոլորը, անգամ՝ տատիկներն ու պապիկները:
Facebook
Twitter
Telegram
Print
Email